25522

Registered Charities

You are here:

He Aratohu ki te Ture Kaupapa Atawhai 2005

Updated June 2010

Ka taea e koe te pānui tētahi tārua o te Ture Kaupapa Kaupapa Atawhai 2005 i www.legislation.govt.nz, te hoko rānei tētahi tārua mai i tētahi toa pukapuka o Bennetts.

On this page:

He Kupu Whakataki ki te Ture Kaupapa Atawhai

I whakamanahia te Ture Kaupapa Atawhai 2005 (te Ture) i te marama o Paenga-whāwhā 2005. Nā te Ture i tū ai te Komihana Kaupapa Atawhai (te Komihana) i te 1 o Hōngongoi 2005.

Ko ngā mahi matua a te Komihana he:

whakatū me te whakahaere i tētahi pūnaha rēhita me te aroturuki mō ngā rōpū whakahaere kaupapa atawhai
whakarato tautoko, mātauranga hoki ki te rāngai kaupapa atawhai mō ngā mahi kāwana me ngā mahi whakahaere pai.

I tīmata ngā rēhitatanga i raro i te Ture i te 1 o Hui-tanguru 2007 i te tuwheratanga o te Rēhita Kaupapa Atawhai (te Rēhita).

E āwhina ana te Komihana i ngā whakahaere e hiahia ana ki te rēhita mā te whakarato pārongo ki te reo mārama mō te Ture me te tono hoki ki te rēhita i raro i te Ture.

Te Poari Whakakaere

E tohua tētahi poari e te Minita mō te Rāngai ā-Hapori, ā-Tūao hei kāwana i te Komihana.

Kei te Pou Whakahaere me ētahi atu kaimahi te kawenga mō ngā mahi ia rā o te Komihana.

Hinonga Karauna Motuhake

He Hinonga Karauna Motuhake (ACE) te Komihana. He whakahaere motuhake tētahi ACE mai i te Kāwanatanga engari me “whai whakaaro” ki ngā kaupapa here kāwanatanga ina tohutohutia e tētahi minita haepapa.

Ngā mahi a te Komihana

Ko ētahi o ngā mahi matua a te Komihana e ai ki te Ture he:

whakarite mēnā me whakaae ki tētahi tono rēhita, kāore rānei
aroturuki i ngā Puka Pārongo ā- Tau e tukua e ngā rōpū kaupapa atawhai rēhita
pūrongo me te tuku tūtohutanga ki te Kāwanatanga mō ngā take rāngai kaupapa atawhai
whakatairanga pono ā-iwi me te māiatanga ki te rāngai kaupapa atawhai
whakatenatena i te whakamahinga tōtika o ngā rauemi kaupapa atawhai
ako i ngā rōpū kaupapa atawhai ki ngā mahi kāwana me ngā mahi whakahaere pai
whakaara me te whakatairanga rangahau mō te rāngai kaupapa atawhai.

Te whakatairanga o te pono ā-iwi me te māiatanga

Ko tētahi mahi a te Komihana he whakatairanga i te pono ā-iwi me te māiatanga ki te rāngai kaupapa atawhai.

Ka tutuki i te Komihana taua mahi mā te whakatenatena i ngā mahi kāwana pai me ngā mahi whakahaere pai, ā, mā te whakarato i ngā papanga mātauranga me ētahi atu āwhina. Ka āwhina tēnei kia tōtika ake ngā rōpū whakahaere.

Mā te rēhita me te aroturuki i ngā rōpū kaupapa atawhai tētahi atu tikanga mō te whakamōhio ki te iwi whānui kei te tutuki i ngā rōpū kaupapa atawhai ngā mahi e kī ana rātau kei te mahia e rātau.

Te mātauranga me te tautoko

E wātea ana ngā tohutohu me ngā āwhina a te Komihana ki ngā rōpū kaupapa atawhai katoa, ahakoa rēhita, kāore rānei. Ka taea anō e te Komihana te tuku tohutohu ki te Kāwanatanga mō te rāngai kaupapa atawhai, ā, me te whakatairanga rangahau i te rāngai.

Te rēhita

I whakatuwheratia te Rēhita Rōpū Kaupapa Atawhai i te 1 o Huitanguru 2007.

He mea tūao te rēhita hei rōpū kaupapa atawhai, ā, kāore he utu rēhita. Ka taea te rēhita i runga ipurangi, ā-pepa rānei.

Hei aha te take o te rēhita?

He maha tonu ngā hua ka whiwhi i ngā rōpū kaupapa atawhai rēhita:

1. Te whiwhi, te mau i ngā whakawāteatanga tāke

Nā ngā rerekētanga ki te Ture Tāke Moni Whiwhi 2004 me te Ture Tāke Pānga Tuku Iho me te Tāke Koha 1968, ko ngā rōpū kaupapa atawhai rēhita me te Komihana anake e āhei ki ngā tāke whakawāteatanga mō te kaupapa atawhai.

Nā te whai i te tāke whakawāteatanga kua kore ngā rōpū kaupapa atawhai rēhita e utu tāke moni whiwhi (me te tāke utu mahi motuhake), ā, kāore ngā kaituku koha ki ngā rōpū kaupapa atawhai rēhita e utu i te tāke koha. I uru mai ēnei rerekētanga i te 1 o Hōngongoi 2008. Kāore ēnei rerekētanga e whai pānga ki te mana kaituku.

2. Te whai ingoa ki runga i te Rēhita Rōpū Kaupapa Atawhai

Ka taea e te iwi whānui te tiro i runga i te Rēhita i runga ipurangi i www.charities.govt.nz ki te rapu mōhio mō tētahi rōpū kaupapa atawhai rēhita.

3. Te tiki nama rēhita

Ka tukuna e te Komihana tētahi nama rēhita ahurei ki ngā rōpū kaupapa atawhai rēhita, e taea e rātau te pānui ki runga papanga tokonga. He tohu ki te iwi whānui kei te ū ngā kaupapa a te rōpū rēhita mō te rēhita i raro i te ture.

4. Ngā pārongo mō te rāngai kaupapa atawhai

Mā te rēhita, ka whakaratoa e te Komihana ngā pārongo mō te rāngai kaupapa atawhai i Aotearoa. Ka āwhina tēnei i te Komihana ki te whakatutuki i tana kaupapa mātauranga me te tautoko ki te rāngai me te iwi whānui.

5. Te haere ki ngā hui ā-tau a te Komihana

Whakahaeretia ai e te Komihana ngā hui ā-tau e āhei ai ngā rōpū kaupapa atawhai rēhita te whai wāhi mai. Ka whai wāhi ngā rōpū kaupapa atawhai ki te tuku kōrero ki ngā mahi a te Komihana.

Tērā pea me rēhita ngā rōpū tiaki kaupapa atawhai me ngā manatōpū

Ahakoa he rōpū tiaki kaupapa atawhai, manatōpū rānei tētahi whakahaere, me rēhita tonu ki raro i te Komihana mēnā e hiahia ana kia whai hei hinonga rōpū kaupapa atawhai rēhita.

Ko wai hei rehita?

Ka taea e tētahi whakahaere te rēhita mēnā:

i whakatūria me te whakahaere mō ngā kaupapa atawhai
ehara mō te whiwhi hua whaiaro ki tētahi tangata, rōpū rānei
e whai ingoa ū ki te Ture
ko ngā āpiha o te whakahaere e whai tohu kia tū hei āpiha i raro i te Ture.

Ka taea e tētahi whakahaere te uru ki te rēhita mēnā e whai ana i tētahi kaupapa atawhai-kore tuarua, tāpiri rānei (pēnei i te taunakitanga) hei wāhanga o tā rātau kaupapa kaupapa atawhai.

Te whakarite mō te rēhita ā- rōpū

Nā te Ture e āhei ana te Komihana te whakarite i ētahi rōpū kaupapa atawhai ānō nei he hinonga kotahi iho. Me mātua tau te Komihana kei te:

ū ia whakahaere i roto i te rōpū ki te rēhitatanga hei rōpū kaupapa atawhai
tata te hono o ngā whakahaere
tika ki te whakarite i ngā whakahaere nō te rōpū kotahi.

Me titiro anō te Komihana ki te whānuitanga e ōrite ai ngā kaupapa atawhai o ngā whakahaere.

Te whakamāramatanga o te kaupapa atawhai

E whakamahia ana e te Komihana te aromatawai ngātahi tawhito mō te kaupapa atawhai. E ai ki te aromatawai, me mārama te takoto o ngā ture o tētahi whakahaere ko ana kaupapa mō tētahi, ētahi rānei o ēnei e whai ake:

te whakamāmā i te pōharatanga
te hāpai i te mātauranga
te hāpai i te whakapono
ētahi atu take e whai hua ai te hapori.

Mō te hapori anō te whai hua o te whāinga o te rōpū kaupapa atawhai.

Ngā whakaritenga rēhitatanga

Mō te rēhita, ko tā ngā whakahaere me:

whakakī i tētahi puka tono, e whai ana i ngā pārongo mō ā rātau mahi kaupapa atawhai ināianei, me ērā e tūmanakotia
tuku i tētahi tārua o ā rātau ture, kaupapa ture, tūtohinga, tētahi atu pepa whakatakoto tikanga whakahaere rānei
whakamana i ngā āpiha o te whakahaere mā te whakakī i tētahi Puka Whakaaetanga Āpiha.

Ina rēhita, ko tā ngā whakahaere me:

tuku i tētahi Puka Pārongo ā- Tau i roto i te ono marama o te rā whakarite
whakamōhio atu ki te Komihana i roto i te toru marama mēnā ka rerekē ngā pārongo mō tō rātau whakahaere.

E āwhina ana te Komihana i ngā rōpū kaupapa atawhai ki te rēhita mā te:

whakarato aratohu mō te tono
whakarato i ngā pārongo o te wā mō te whakaritenga mō te rēhita pēnei i te kaupapa atawhai, ingoa me ngā āpiha
whakarite kei te ū ngā pārongo o te Rēhita ki ngā whakaritenga o te Ture.

Te ūruhitanga o ngā whakaritenga rēhita

E whai mana ana te Komihana ki te tirotiro kei te tutuki i ngā rōpū kaupapa atawhai rēhita tā rātau kaupapa ake me te ū anō ki te Ture.

Kei te Komihana anō te mana ki te:

whakatau whiunga whakahaere mō te kore ū ki ngā whakaritenga o te Ture
tuku pānui whakatūpato
whakamōhio i te kore ū
whakahaere whakatenatena anō
tango i te rēhita ngā rōpū kaupapa atawhai i kaha, i auau rānei te takahi i ngā whakaritenga o te Ture.

Te rēhita

Ka taea te mahi i runga ipurangi, ā- pepa rānei.

E whakahaeretia e te Komihana tētahi hōtaka mātauranga me te pārongo ki te āwhina i ngā whakahaere e hiahia ana ki te rēhita.

Te utu o te rēhita

Kāore he utu mō te tono ki te rēhita.

Te utu mō te tuku Puka Pārongo ā-Tau

He utu mō te tuku i te Puka Pārongo ā-Tau mō ngā rōpū kaupapa atawhai e nui atu i te moni whiwhi ā-tau i te $10,000.

Ko te utu he:

$50 mō te tuku ā-ipurangi
$75 mō te tuku ā-pepa

Kāore he utu mō te tuku Puka Pārongo ā-Tau ki ngā rōpū whakahaere kaupapa atawhai e iti ake ā rātau moni hua ā-tau i te $10,000.

Ngā kawenga a Te Tari Tāke

Kei te Tari Tāke tonu te kawenga mō te whakahaere i ngā tāke whakawateatanga. E whai kawenga tonu ana te Tari Tāke mō te arotake i te mana whakawhiwhi (ngā koha ki tētahi rōpū kaupapa atawhai e āhei mō ngā moni tuku me ngā tangohanga).

Ko te tikanga e āhei ana ngā rōpū kaupapa atawhai i raro i te Ture Rōpū Kaupapa Atawhai mō ngā whakawāteatanga mai i te tāke moni whiwhi ki ētahi, te katoa rānei, o ā rātau moni hua.

Kāore he here ki a rātau ki te tono ki Te Tari Tāke mō aua whakawāteatanga.

Ina rēhita, ka whiwhi pārongo rātau mai i Te Tari Tāke e rārangi ana i ngā whakawāteatanga e āhei ana rātau, ā, me ngā mea hei tutuki mā rātau kia ū ai ki ngā whakaritenga o aua whakawāteatanga.

Kua whakaputahia e Te Tari Tāke te Operational Statement OS 06/02 Interaction of tax and charities rules, e kapi ana i te tāke whakawāteatanga me te mana whakawhiwhi, e whakarato pārongo ana anō mō ngā whakaritenga mō te whakawāteatanga tāke moni whiwhi me te mana whakawhiwhi. Ka taea e koe te tiki tārua o tēnei whakaaturanga i www.ird.govt.nz.

Mō ētahi atu pārongo mō ngā tāke whakawāteatanga, tēnā whakapā atu ki Te Tari Tāke i 0800 377 774.

Ētahi atu pārongo

Ka taea e koe te pānui tētahi tarua o te Ture Rōpū Kaupapa Atawhai 2005 i www.legislation.govt.nz, hokona mai rānei i te toa pukapuka o Bennetts